كاس كبير حليب دافئ تنخلطو مع معلقة كبيرة خميرة الخبز حتى تدوب فيه تتزيد 2 ملاعق كبيرة زيت 2 بيضات 2 معالق سنيدة وقشرة حامضة محكوكة (تتعطيها طعم مميز) قبصة ملح تنخلط هادشي مزيان وتنبدا نزيد الطحين بالتدريج حتى تتولي عجينة تتلصق في اليدين (ضروري تبقا تلصق باش تجي مفشفشة).

تنخليها تتخمر وتنرش بالطحين ونطلقها رقيقة شوية ونقطعها دوائر ونثقبها من الوسط بدائرة أصغر حجم منها. نفرش صينية الفرن بورق الطبخ ونحط فيها دونات ونخليهم حتى يخمرو

ندهنهم بالحليب او بلاش اصلا وجههم تيتغطا. وتندخلهم للفرن سخون من قبل على درجة حرارة 180 تنشعل العافية من التحت حتى تيطيبو عاد تنحمرهم من الفوق

ملي تنخرجهم تنزوقهم بالشكلاط لكم الاختيار في التزيين. هاد الدونات تيتباعو غاليين في المغرب تيديرو 2دراهم ونص وفي الخارج اكثر. وهاد الطريقة تتقام إقتصادية ونااجحة تيطلعو احسن من المقليين وصحيين. انا درت نص الكمية خرجات لي أكتر من 20 حبة. وتيليقو حتى لكوتي دراري صغار . وممكن تحتافضو بيهم في المجمد

بالصحة والراحة