بعض طواجين الجنوب

المقادير

السلام عليكم أخواتي المقادير على حسب الطاجين تفضلوا معا وغتوضح كلشي مرحبا

zuba

اضغطي هنا لمشاهدة الصفحة الخاصة بالعضوة ، والتعرف على مشاركاتها


9409 مشاهدة , منذ15 مارس 2012

معلومات عن الوصفة

  • وقت الاعداد

    30Min
  • وقت الطهي

    60 Min
  • الوقت الإجمالي

    90 Min

الطريقة

اختي خدي الطاجين ديري فيه نصف كأس من الزيت شوية الملح شوية التحميرة شوية الخرقوم شوية لبزار شوية ملون اصطناعي حركي هاد العطرية حتى تسخن أو مرغي فيها قطع الدجاج ملي يتقلاو زيدي بصلة كبيرة مشلدة +جوج مطيشات بدون زريعة مقطعين طريفات صغار+ شويةالربيع مْطقطق نخليوه إطيب شوي حتى تدبال البصلة أو مطيشة عاد نضيفُ الخضر ألي عندنا،أنا كنطيب طاجيني على مقلة التقيلة ديال وجدة تتحافظ على الطاجين باش ميتحرقش أوكيجي بحال إلى طاب على الفاخر،أماإلى خصّوالماء كنزيدُ كاس ماء سخون غي في الجْناب ما شي فوق الخضرةباش مايجيش باسل ـ إلى كنتي دايْرَ اللحم مدّريش الخضر تسناي حتى يقرب إطيب اللحم عاد رمي الخضرباش متعجنش ليك. بالنسبة للخضرديري جوج أنواع فقط كاين طاجين ديال ـ الجلبانة وخيزو ـ كاين ديال ـ جلبانة أوبطاطا ـ جلبانة أو كرعة خضْرَديك لمكورة حلوةحسن من الطويلَ ـ جلبانة مع البسباس ـ الجلبانة مع القوق ـ الفول ضروري تحيدي ليه الضْفَرْأولَََغْشَا ديالُ راه تيطلق لَمْرورَة في الطاجين، ممكن تْديريه مع خيزو أوْ بطاطاـ الخرشف مصلوق +الزيتون أوبطاطا أوالحامض مرقد ـ بطاطا مع الزيتون ـ بطاطا مع اللفت الأصفر ـ بطاطا أوالفلفلة حمرة مشوية ـ بطاطا مع خيزو ـ خيزو مع اللفت الأبيض ـ السلاوي بوحْدُوـ السلاوي مع الفلفلة الخَضْرَ ـ اللوبيا خضرة بوحدها مع القرفة كتجي لديدة.

كينين طواجن طريقة التحضير ديالهم مختالفَا على الطريقة اللي عطيتك منها لحلو بحال طاجين ديال الزبيب أو البصل أوْ البرقوق واللوز أو السفرجل معسل مكنديروش فيهم التحميرة و مطيشة إنما كنديرو سكنجبير و القرفة.

كاين طاجين ديال بطاطا مقلية حتى هو مختالفْ عليهم بِحَيْثْ مكندروش فيه التحميرة أو مطيشة إنما تعملو سكن جبير أُوكنخضْروه بي ثلاثة ديال البصل الأبيض مقطع هلايل رقاق أو الزيتون أو الحامض مرقد ملي إطيب نعملُ فوقُ بطاطا مقلية أوْ كرعة خضرَ ديكْ الطويلَ مقطعَ دوائر رقاق مع شوي الملح أو مقلية راه ملي تتقلَى كتعطي وحد المداق رائع ،أوممكن تخضريه بالدنجال مع شوي الملح مقطع دوائر أو غبري عليه الدقيق أوقليه باش ميشروبش ليك الزيت فعلا بطاطا مقلية كتجي إما مع الكرعة مقليةأو الدنجال مقلي.
طاجين الحوت طريقتُ مختالفَا كيف ْ كتعرفُ بحيث كتعملي نصف كاس من الزيت في الطاجين +معلقة كبيرة التحميرة +نصف معلقة لبزار+نصف معلقة صغيرة خرقوم + نصف معلقة صغيرة كامون+ ملون اصطناعي+ نصف معلقة صغيرة معمراش ملح+ثلاثة ديال ضروس ثوم محكوك+ المعدنوس والقزبر مْقطع تنقليوْ هد العناصرشوي مع التحراك باش يعطيوْ النسمة لأن العطرية إلى ماتقلاتش شوي في الزيت مكتعطيش ديك النسمة ديالها تنمرغُ الحوت في هد الخليط أو نحطوه في شي طبسيل.نَخُذخيزو نقطعُ دوائر رقاق+ثلاثة مطيشات محكوكين نعملوهم في الطاجين نْستفُ فوقُ الحوت لي مَرَّغْناه ْ في العطرية ألي في الطاجين أو نزوقُ بِدَوائِر ْ مطيشة والفلفلة لحْلوَّوالزيتون والحامض وفلفلة وحدة حارة أو نخليوه إطيب.

  1. أضيف بواسطة zahiraatlas بتاريخ 8 ابريل 2012

    شكرا أختي علا هاد التوضيحات الجميلة الا كتبين كل طاجين سواء بالحم أو الدجاج أو الحوت كل طاجين بالخضر علي كتعتيه نسمة رائعة ♥♥

  2. أضيف بواسطة zahiraatlas بتاريخ 8 ابريل 2012

    مشاء الله تبارك الله عليك

  3. أضيف بواسطة zuba بتاريخ 12 ابريل 2012

    بصاح أختي الله يعطيك الصحة فعلاً راكي أنيقة

  4. أضيف بواسطة zuba بتاريخ 12 ابريل 2012

    واو

  5. أضيف بواسطة May بتاريخ 15 ابريل 2012

    أخيرا غادي نجرب طاجين ب طرق جديدة نيت مليت من نفس طواجن لي نعملها ديما. شكرا

  6. أضيف بواسطة zuba بتاريخ 15 ابريل 2012

    may أللا بصحة لاهلا يحوجك

أضف التعليق

مواضيع مختارة